Wheelout
Here I come again…

Oct
05

Wheel out. Here I come again. Run go tell yuh enemy, run go tell yuh fren. Liar and him burning bush a lie to de people, dem lies thick like treacle and pile up like steeple. Followers of Babylon, Bush a dem disciple. Him lead, dem follow, de man a SPREAD SORROW.

Me nearly mash hole in Rizla floor, when me jaw drop, can’t believe educated man, can chat so much crap. When me hear de lies dat dem tell, Rastafari, can’t believe it, Babylon CONDEMN MAN TO HELL. Bush an him branches spread far and wide, and de dutty likkle liar a stan by him side. Now dem have brown, but we is no fool, Bush, Blair, Brown, de whole a dem tutor at de same school.

News, news, me ears dem abuse, a legion of devil, de wicked man choose. Axis of evil, fight for democracy, dem a acts of evil, dem a mock we. Chuh. Mek me tun it off yah. Bun burning bush, brown an him liar, listen dem lies is not how I inspire.

Me miss me woman an me need her close. She is who I live for and long for de most. Me next two woman essential for me need, one give me money an one give me weed. Me queen head try tell me, Sellassie I pickney, dat she alone must be the one and only. She deh a Babylon too long, nuh realise, I n I, Rastafari, will tek her to zion. She conscious, righteous an have brains like steel, to back foot Christmas morning, me miss her fe real.

Job, money, commitment is all she a talk, pan higher meditation I man a walk. She can’t see me fight, her mind get corrupt, lion soldier, at de frontier, and me NAH GIVE IT UP. Still.

A nough woman out deh fe good man like me. One look pan me face an me quality reveal, to good, steady woman, I always appeal. A wheh Rizla deh? Me well need a draw, alone in dis yard, me heart sad and raw. Three days me a suffer wid no comfort from my woman, man stallion like I n I don’t deal wid starvation. When me need to replenish, pray seh next man, nah eat off my dish. Me nuh ready fe famine, a feast me warn feast, me drain out like string and de pressure can’t cease.

Ongle ital sensi can calm me nature, me nuh warn do nuting me regret later. A wheh me Beaver and me new pair a Clarkes? Street a call out fe me and I man a hark. Nough sweetie pumpkins out in de street fe I man defeat. One ting. Me know me Empress love me, Rastafari a de best ting dat ever happen to she. Rewind and come again. 

Oct
04

Wheel out. Here I come again. Run go tell yuh enemy, run go tell yuh fren. Greetings in the name of his IMPERIAL MAJESTY HAILE, HAILE, I, SELLASSIE I, DE FIRST. Jah bring I joy in de morning. Last night me sleep like a baby, Rizla nuh spiteful an selfish, like me brodda and woman, dem crazy. Wid de wisdom and blessing I a impart, Rizla see me sufferation and help me from him heart.

Rizla yard nice. Him kitchen full up a food and full up a spice. Ever living, ever sure, praise Rastafari, more and more. Everyting dat me need de man have, those who know love, mek dem show love. Ongle one or two time a week him come here, ten woman him have all bout. Never in him yard, always out. Him sleep a dem place, nyam dem food, bun dem power, an when him ready fe bade, a dem yard him showa. A suh it fe go.

How come I have it hard an same man like me have it easy? Me know seh me good, and me kind and me peasy. Me nuh mess wid nobody, treat people shoddy, only ital and vital I put in my body. And yuh know de weed VITAL.

Me nuh tek back me talk or give people trouble, but every move me mek, Babylon burst I bubble. Call on Sellassie I night, day and morning. Blazing fire of Zion is what I am yearning. Me clean and live up absolutely and neva let de head of my stream get polluted. Me render me heart, not me garment, and me conscious and stay out a careless argument.

On de highways and de byways me spread de scent around, from de sky up a above to JAH fertile ground. Outside rain a fall through Babylon pollution, to full up my natty wid dem chemical solution. Today me a sleep, build up my strength, to fight de devil, yuh need strength and length.

Rizla a artical bredrin from de heights. Highest heights of de HIGHEST HEIGHTS. Me will step out when de weather is right. Mek a likkle soup, watch tell lie vision, keep me countenance and me I-teous, righteous meditation. Rastafari. Rewind and come again

Oct
03

Wheel out. Here I come again. Run go tell yuh enemy, run go tell yuh fren. De chick, she mussi sick, she mussi want a phensic. 1983, dem seh Africa will be free. To be poor is a crime, and right yah now, come in like a my time.

I n I no come to fight flesh and blood, but a pure spiritual wickedness me find in low places, me brodda and me woman bad mind faces. Me hungry, me tired and she a gwaan bad. Tell me, ME, to come out a her yard. Gal a try disrespect me. Money done, nuting nah run, but these tribulations I will overcome, ca me serious, me nuh joke, me nuh come yah fe fun.

Me bredrin Rizla nuh deh a him a yard, him will let me cotch, true seh I have it hard. Him have light, to keep I n I spirit shining bright, run weh dem and dem wickedness, dem a go fine out me right. Yuh can see wha dem a do? A fight down I, rastafari, just a try a likkle ting to mek it throu.

Well. Me foundation strong, me right, me nuh wrong. Dem can’t free up. Dat’s irie wid me. Watch. Be still. Those wid eyes, mek dem see. Rewind and come again.

Oct
03

Wheel out. Here I come again. Run go tell yuh enemy, run go tell yuh fren. Me brodda too lie, seh him nuh have no money, when I n I a suffer, him life bright and sunny. Me vex, me vex, me can’t stop screw, wotless bwoy, tell me, ME, to find someting fe do. IMAGINE.

Me hungry like a dawg and me well need a food. Me brodda an me woman a gwaan too rude. But, me is not a worrier, ever liveth, rastafari, at de control tower. Me and dis draw will hold a meddy, me nah kick off, keep meself, nice and steady.

Peace and love come before de fire me a bun. Wid dem false Babylon life, all dem live fa a fun. But soon, my time will come, down pressors will run, and, JAH, Rastafari, will free I n I from dem everlastinest abomination.

Lata me sweet up de woman, mek her feel nice. Stroke her nice round batty and look inna she eyes. Money a come, me feel it strong, when me sweet her up, she can’t turn I down. Yeah man.

Chill out, hold a five, when me wake, give her de cool loving, keep de spirit alive. Dis is how I have to live, live a life fe love and love a life fe live. Sellassie I know, only goodness me give. Rewind and come again.

Oct
03

Wheel out. Here I come again. Run go tell yuh enemy, run go tell yuh fren. Babylon teef me light, because me money done, me always have nough fight, but rasta will overcome. Run weh dem and dem light, me bun fire pan dem corruption, when my current ready fe blaze, dem will know eruption.

How me a go see fe cook a likkle ital? Me need fe mek a raise, power is vital. Me trust so much of de good lambspread, now me nuh have no power, BABYLON DREAD. 

Mek I go an check me brodda in him posh office block. Frighten de people, wid me pretty dreadlocks. Me nah kin teet wid dem deh dutty john crow, ca me a de original NATTY HEAD BONGO.

Him nah gi me gow, dat yuh fe know, wash belly pickney, last one born, a mek good money an can give me a corn. A nuh just chat, I a chat. A teach, I a teach. I man come to free yuh from Babylon prison, show yuh dem evilous plan. De staff of correction I have in my hand, I give you direction, so don’t feel seh, I a simple rastaman. Mek me raise, get me light, bun a spliff, feel alright. Rewind and come again.

Oct
02

Wheel out. Here I come again. Run go tell yuh enemy, run go tell yuh fren. Me check one of me woman, and she a gwaan funny, just ca me warn borrow a likkle money. Fifty, dats all I need, but she a gwaan shifty, set speed.

So, about de likkle sistren, dat me sight de odda day, me step up an a reason, but she a gwaan one way. True seh she nuh know, rasta pure and clean, a pure love me bring, Jah inna my spring, a MEAN SHE MEAN. 

Me use de Babylon biro fe get me giro. Only get half ounce of me nation healing, pure struggulation, I man is feeling. Me need mek a change, sometime soon, but , chuh, today, couldn’t rise till noon.

So, tomorrow, me a go look some money fe borrow, get a nice draw and listen some tune. A me bredrin dat? ‘Yo.  Yo. Yo. Pull ova. A wheh yuh a go? Me a follow yuh, ca… man nuh have nuting fe do.’ Rewind and come again.

Oct
01

Wheel out. Here I come again. Run go tell yuh enemy, run go tell yuh fren. I n I a trod through Babylon region but my rod and my staff protect I from de system. Healing of de nation kill my motivation. Me cheque done bounce ca me spen me money pan an ounce. But when me bun me chalice me nuh harbour no form a malice. Me sight one sistren who look criss, me a go look fe her lata cos me she can’t dis.

A long time me nuh work inna de babylonian system, but de beast still a haunt I, an taunt I, an try lock up I n I wid dem driving fine. How yuh can fine me when me a drive up an down on my time? But, as me tell de judgement in de court house, licence an paperwork a nuh sumting I promote.

De pretty likke sistren, she can’t turn I down cos me wearing de crown and when gal a deal with I n I, dem nah fall down.

Rain a fall but de dutty tough, nuting nuh tough like how I have it rough. Me have fe go a Job Centre, pan dem electronic corruption system me business dem want enter. Dem love babble inna Babylon, pure wickedness dem a talk, but me know seh de whole a dem, a pure HARBOUR SHARK.

Hell stone and brimfire just to get me giro, but me nuh deal wid pen and me nud deal wid biro. Tribulations Babylon try render but Sellassie I know, me nah surrenda. Be strong, stand firm, watch dem system and learn. Chuh. Why dem a gwaan suh? All I warn do, is cut and go thru.

When me done praise de I-sis, me deal with me crisis. So, giving you a hail, sufferation I a go through but Rasta nah fail. Rewind and come again.